DGK sədri: Azərbaycan Aİ ölkələrinin istifadə etdiyi tranzit sisteminə qoşulur Ümumi iqtisadi xəbərlər 25/06/2026 Paylaş FacebookXWhatsAppTelegram Azərbaycan Avropa İttifaqına (Aİ) üzv olan ölkələrin də iştirak etdiyi yeni tranzit sistemə qoşulmağa hazırlaşır. Banker.az xəbər verir ki, bunu “Report”a və “İctimai TV”yə müsahibəsində Dövlət Gömrük Komitəsinin (DGK) sədri, gömrük xidməti general-polkovniki Şahin Bağırov bildirib.⚡️📲Təcili xəbərlər üçün bizi WhatsApp kanalından izlə Onun sözlərinə görə, Azərbaycan artıq avtomobil daşımaları üzrə bir neçə konvensiyaya üzv olub: “Bu sahədə biz işlərimizi davam etdiririk və beynəlxalq standartlar əsasında ölkəmizdə tranzit imkanlarının genişləndirilməsi, sərbəst hərəkətə şəraitin yaradılması, rəsmiləşdirmə müddətlərinin qısaldılması, yoxlamaların risk əsaslı yanaşma ilə həyata keçirilməsi üçün çalışırıq. Bununla yanaşı, müasir dövrün tələblərinə uyğun yeni alətlərin tətbiqi istiqamətində də iş aparılır. Bu məqsədlə yeni kompüterləşdirilmiş tranzit sisteminə – Avropa İttifaqında 27 dövlət, ümumilikdə 39 ölkə tərəfindən istifadə olunan sistemə qoşulmaq istiqamətində fəaliyyət göstəririk. Bu çərçivədə biz 2 konvensiyaya üzv olmaq ərəfəsindəyik – Ümumi Tranzit Proseduru haqqında Konvensiyaya və Mallarla Ticarətdə Sənədləşmənin Sadələşdirilməsi haqqında Konvensiyaya qoşulma prosesinə başlamışıq”. Ş.Bağırov vurğulayıb ki, bu proseslər yaxın gələcəkdə başa çatdırılacaq: “Çünki artıq bu istiqamətdə start verilib və biz qonşu ölkələrdə istifadə edilən elektron əsaslı, təminat əsaslı tranzit qaydalarını, eləcə də kağızsız texnologiyalar vasitəsilə rəsmiləşdirmə imkanlarını ölkəmizdə də tətbiq edə biləcəyik. Bu Avropa istiqamətində dəhliz boyu tətbiq olunacaq. Eyni zamanda biz Asiya regionu ilə də bu işləri aparırıq. Burada Mərkəzi Asiya dövlətləri, Çin və digər tərəfdaşlarla tranzit əməliyyatlarının sadələşdirilməsi istiqamətində, o cümlədən Asiya İnkişaf Bankının (ADB) dəstəyi ilə fəaliyyətlərimiz davam edir. Hesab edirik ki, bu sahədə də müsbət nəticələr əldə ediləcək və bu da öz növbəsində Orta Dəhlizin gömrük aspektindən daha cəlbedici olmasına töhfə verəcək”. DGK-nın sədri əlavə edib ki, Orta Dəhlizin əhəmiyyəti olduqca böyükdür və onun digər dəhlizlərlə müqayisədə bir sıra üstünlükləri mövcuddur: “Şübhəsiz ki, burada coğrafi mövqe, məsafələr, infrastruktur imkanları ilə yanaşı, gömrük tənzimlənməsi də əhəmiyyətli rol oynayır. Bundan əlavə, tranzit potensialının genişlənməsi ilə paralel olaraq infrastrukturun da təkmilləşdirilməsi həyata keçirilir. Məlumdur ki, dövlət səviyyəsində ölkəmizdən keçən tranzit məhsul və yüklərin daşınma həcminin artırılmasına, tranzit imkanlarının genişləndirilməsinə dair müvafiq sərəncam imzalanıb. Həmin sənəd 2024-2026-cı illəri əhatə edir və biz bu istiqamətdə artıq fəal şəkildə işlərimizi həyata keçiririk. Digər qurumlarla birlikdə məlumdur ki, tranzit potensialının və yük axınının inkişafı üçün bir sıra tədbirlərin görülməsi zəruridir. Bu, ilk növbədə yol infrastrukturunun, keçid imkanlarının və digər istiqamətlər üzrə təkmilləşmənin təmin edilməsini nəzərdə tutur. Lakin əsas məsələlərdən biri də gömrük tənzimlənməsi və gömrük qaydalarının tətbiqi vasitəsilə tranzit əməliyyatlarının asanlaşdırılmasıdır”. Rəqəmlərə diqqət yetirərək, Ş.Bağırov xatırladıb ki, 2025-ci ildə 18 milyon tondan artıq yük Azərbaycan ərazisindən gömrük nəzarəti altında tranzit olaraq keçib. Cari ilin 5 ayı ərzində isə bu göstərici 8,2 milyon ton həcmində olub. “Bu rəqəmlər özlüyündə çevik gömrük tənzimlənməsinin tətbiqinin vacibliyini ortaya qoyur. Gömrük əməliyyatlarının vaxtında icra edilməsi ilə tranzit axınına əsassız maneələrin yaradılmaması böyük əhəmiyyət kəsb edir. Bunu təmin etmək məqsədilə biz hər şeydən əvvəl öz daxili resurslarımızı səfərbər etmişik. İlk olaraq rəqəmsal rəsmiləşdirmə mexanizmlərini tətbiq edirik. Bu çərçivədə elektron bəyannamə sistemi, yüklər və ya nəqliyyat vasitələri ölkəyə daxil olmamışdan əvvəl rəsmiləşdirmə üçün məlumatların əvvəlcədən toplanması mühüm şərtlərdən birini təşkil edir. Buna görə də biz əlaqədar qurumlarla bu sahədə əməkdaşlığımızı davam etdiririk”. Son xəbərlər Energetika “Chevron”un rəhbəri: Benzinin qiyməti probleminin sürətli həlli yoxdur. Bu, zaman tələb edir 25/06/2026 Bank xəbərləri Azərbaycanda yeni verilmiş kreditlər ucuzlaşır – Mərkəzi Bank 25/06/2026 İnvestisiya Proqnoz bazarı platforması “Kalshi” $40 mlrd. dəyərləndirmə ilə investisiya cəlb etmək üçün danışıqlar aparır 25/06/2026 Ölkə daxili Şəhid olmuş bir qrup hərbi qulluqçu və mülki işçi ölümündən sonra təltif olunub 25/06/2026 Digər xəbərlər Energetika “Chevron”un rəhbəri: Benzinin qiyməti probleminin sürətli həlli yoxdur. Bu, zaman tələb edir 25/06/2026 Bank xəbərləri Azərbaycanda yeni verilmiş kreditlər ucuzlaşır – Mərkəzi Bank 25/06/2026 İnvestisiya Proqnoz bazarı platforması “Kalshi” $40 mlrd. dəyərləndirmə ilə investisiya cəlb etmək üçün danışıqlar aparır 25/06/2026 Ölkə daxili Şəhid olmuş bir qrup hərbi qulluqçu və mülki işçi ölümündən sonra təltif olunub 25/06/2026